胡志明市 * 住 ::: Mövenpick Hotel Saigon

 

我係一個不喜歡麻煩既人

能夠充分表現出我怕麻煩既性格係o係去旅行既時候

討厭擠迫,討厭排隊,討厭走回頭路,更討厭轉酒店!!

雖然好多朋友都鐘意住唔同酒店

但對我黎講,隔1,2天換新酒店係極盡麻煩既事

要收搭行李,然後再東找西看有沒有遺漏物品,壓力實在很大

去旅行唔係要放鬆身心嗎,咁反而令到自己神經丐丐,樂趣都沒了

所以呢次,我都係決定五日住同一間酒店

酒店名稱係Mövenpick Hotel Saigon

____________

Mövenpick唔算係一間地點便利既酒店

但再去hcmc,我都係會揀佢

酒店大堂光猛新淨,採光度充足,工作人員態度誠懇

雖說3點先可以入住,但實際上2點已經俾鎖匙我地 

 

一入房,經過一條短短既走廊,就可看到king size雙人床

雙人床床褥軟硬適中,訓得非常舒適

仿法式設計既床架樣子非常討好,同成間房既風格好搭

呢類走復古路線既房間,彷彿令我感覺置身於歐洲酒店一樣

 

現在新式酒店特點是係:房間同洗水間可互望

無論同朋友定係情侶一齊旅行,遇到呢種設計都係令我好懊惱

可能我比較保守吧~

 

現在電視已經成為我心目中反映酒店新舊程度既指標 

搵酒店時,見到房內係用薄電視的我先會考慮

如果唔係,就直接從名單剔除

 

電視櫃設計挺美

貫徹房內走復古風既調調

 

床邊小桌都有三腳插同兩腳插既插頭提供

咁唔記得帶轉換插都唔使落reception借

係一個好貼心既舉動

 

書枱都有

 

電視櫃同行李架之間有好多空位,放到一個29'同26"既喼

咁放手信位變相多左,就可以買多d野返黎啦!!

  

夾萬少不了

尤其係越南, 危唔危險都好,都係唔好帶住passport周圍走

唔見錢還好,唔件證件就麻煩

 

小食枱有收費零食同免費茶包

仲有風筒同熱水煲

硬件齊全 

 

washroom面積很大

 

馬桶上還有喇叭,直駁房內電視,音效非常強勁

我沖涼前都會將電視轉做mtv台,一邊聽歌一邊沖涼,爽呀!

 

洗手枱用雲石, 一貫大牌酒店風格~

 

基本清潔用品一應俱全

洗髮乳沐浴露係綠茶味

味道幾清香

所以自己帶黎既都無用到

每日都會補充既樽裝水

我們都會預先放係雪櫃雪凍先帶出去 

如果唔係室外氣溫高,好快就會變熱水

  

沖涼地方係企缸,簡直賣飛佛

基本上如果唔係villa,我都唔會用浴缸

所以空間大既企缸最岩我心水

呢度既企缸以酒店黎講都算幾大

至少唔會我一彎低身/轉身就會撞到手

 

至於室外風景.....係0

我們住的樓層太低了,所以只能望到酒店平台

不過算啦,反正每日都早出晚歸,返到酒店又攰 

幾靚既風景都無心情睇

____________

總括黎講,呢幾日係Mövenpick既住宿體驗真係唔錯~

房間整潔,冷氣夠勁,早餐buffet選擇多

就係離市中心遠少少

不過我還是很推介給大家的!!