首爾 * 住 ::: Aventree Hotel Jongno

 

在首爾,地點方便既酒店尤為搶手

可能大家都預視到自己會買到一袋二袋

識揀一定揀近shopping點既酒店

至於我地呢D臨急臨忙訂酒店既,明洞東大門真係唔使諗

所以一早我已經集中搵鐘路區既酒店

呢間aventree hotel jongno係我上agoda時睇到既

開業2年,地點方便,價錢合理,又有free wifi

以性價比黎講都算唔錯

就一於試試佢啦~

____________ 

一出機場後,我地就搭arex出首爾站

再係首爾站轉地鐵1號線(藍色線)市廳方向到鐘閣站

aventree位置正正係仁寺洞後面

酒店離明洞,景福宮只需步行10分鐘

東大門,韓屋村乘地鐵也能在10分鐘內到達

 地理位置上非常理想

 
以上既路線圖係我出發前上酒店官網搵既

照地圖睇,最近酒店既路線應為3-1出口

事實上以步行速度同方位黎計,3-1出口係最理想

但係酒店計漏左一樣野,就係行李

首爾地鐵站內,9成出口都只得樓梯

而有手扶電梯/lift既出口,10個可能只得1個

去程個gib輕都還好,但回程裝滿野

拎住一袋二袋,再加個超過30kg既gib上落樓梯都咪話唔辛苦

所以我建議係,平日往返酒店行3-1出口

與gib同行時,行有lift既5號出口會比較輕鬆

 

3-1出口一上地面就見到鐘閣既地標,鐘閣搭

沿住出口直行,大概行7-8分鐘就可以望到aventree既招牌

  

aventree最好就係自己一幢,唔係同其他工商廈share地方

咁就算夜麻麻返酒店感覺都安全好多

大門口左邊有一間cafe

每日一出酒店就可以買到杯咖啡提神真係perfect~

 

推門進入酒店大堂,先看到右手邊有一排長梳化

再走入一點就看到雜誌架,供應韓國報紙及雜誌

 旁邊則有電腦讓住客上網

不過酒店已經有free wifi,我地又有wifi bb,所以用處不大

接待處面積雖然比較細

但check in前後既空檔時間行李可以放係酒店代保管

至於員工態度就不過不失,不過做野比較慢,英文水平比較差

check in時serve我地既係一個男職員

佢可以用完成唔識英文黎形容

問使唔使俾按金佢聽唔明,問幾點可以攞房又聽唔明

最後佢見我有咁多問題,就叫左另一個女職員黎解答我

但從事酒店業,識講簡單既英文唔係必須的嗎???

定係其實我詢問技巧有問題佢先聽唔明?

 

接待處隔離同樣有一張長椅

我覺得有咁多可以坐既地方可以方便老人家同埋有bb既父母

係幾貼心既設計

  

酒店電梯需要拍房卡先可以運作

咁樣可以避免非住客混水摸魚走入房間樓層

感覺人生同財物安全都有所保障~

酒店樓高12層

3-12層為客房區,健身室係2樓,而餐廳就係basement

但我地既pkg唔包早餐,所以就無綠落去參觀下嚕~ 

 

今次我地住9樓,都算係高樓層呢~

走廊寬敞之餘,房門亦用上比較時髦既深啡色

對呢間酒店既好感度即刻提升左唔少~

 

去過首爾既朋友都知道,首爾酒店,尤其係明洞一帶既房間面積好細

除左一轉身就係床之餘,就連個gib都唔可以平放係地 

但我一入房就"嘩"左一聲

酒店竟然upgrade左間3人房俾我地

間房放左1張雙人床同單人床後仍然覺得空間感十足

 最重要係採光度非常好~

唯一缺點就係張地毯有幾多污穢

尤其係書枱同單人床之間既黑色點點又大又明顯

可惜check out時唔記得同酒店反映下

  

門後貼有走火路線圖

指示都尚算清晰

本來我有期待過酒店房既鎖會唔會好似韓劇入面咁係按密碼既呢

事實證明係我諗多左~

 佢開門方式只係同普通酒店一樣,拍卡感應果種

 

房內有提供循環再用拖鞋

 不過我習慣自己帶拖鞋去,所以無穿過

但酒店用即棄的始終較好

地毯都打掃成咁,真係唔知拖鞋既清潔程度如何

如果前手xg#%#$咁點算..........

 

放鞋既地方上面就係衣架

雖然大部份既首爾酒店都係呢種設計

不過我個人就唔係咁欣賞

掛衫既位置咁細,夏天還好,但到冬天d褸又厚又大件,真係夠3個人用?

既然酒店空間咁大,用返正常衣櫃會比較好~

 

再行入少少就見到掛牆式電視~

電視size好細

但由於我地唔識韓文,電視節目又以講韓文為主,所以我地好少睇

不過值得一提既係,唔知係咪臨近世界盃

所以體育台日夜都播2002年日韓世界盃南韓隊既比賽

每日都見到安貞煥同朴智星好搞笑~

 

床上方有一幅長型既畫~

當初就係睇到呢幅畫,覺得酒店應該幾現代化先揀住呢度

原木色加上民族風味既畫,有一種原始自然既感覺

床褥軟硬度適中,床單也乾淨整潔

為每日疲勞既身驅提供舒適既放鬆點

 

房間有一扇窗,足夠日光漏入黎

為新既一日提供能量~

 

整排書枱放置左充足既日用品

樽裝水,茶包,電熱水器都一應俱全~

  

雪櫃,夾萬就係書枱下面

但雪櫃既容量太少~

 我地第1日就買左幾支香蕉奶,果汁,茶返酒店

但放左一半雪櫃就滿左

建議雪櫃應該要擴建一下 :)

 

浴室方面,aventree既空間都夠大

至少唔會連轉身都要小心翼翼先~

 

同日本一樣,呢度既馬桶都有洗pat pat功能

但係佢既控制鍵就係掛係牆上既

咁樣要按鍵時就更方便~

 

會影呢個洗手盤,係因為我覺得佢好睇唔好用

佢盤頂與盤底之間太淺

 水龍頭又太高

一不留神,水開得太大就會溢哂出黎,整到衫都濕埋........

 

來韓國緊記要自備牙膏牙刷呀~

因為環保關係,除左名牌酒店,其他酒店,民宿,賓館都唔會提供牙膏牙刷

不過其他日用品都一應俱全

尤其lotion又香又滋潤~

aventree只有企缸

由於我自己唔會係屋企以外既地方浸浴(除左溫泉)

所以企缸會令我覺得比較衛生同安全

唯一唔好就係塊浴廉

D水容易濺出去,搞到浴室地濕哂

____________

總括黎講,我覺得aventree都唔錯

反正我地係午出晚歸型,酒店乾淨方便即可

aventree優勝係房間比較大

亦近仁寺洞,吃喝玩樂濕平都方便

而其他位處明洞既酒店如ninetree,PJ,T-MARK雖然方便

但房型細,空間有限

所以要舒適房間定係好地點,就視乎大家需要了~

Hotel Aventree Jongno

65-1, Gyeonji-dong, Jongno-gu, Seoul, 110-170
Tel: +82-2-736-1234

E-mail: re@aventreehotel.com