首爾 * 食 ::: 韓亞飛機餐

 

前文有提過,因為臨時決定去首爾,所以好多野都好趕

當中最驚險既,應該係訂機票呢個環節

 一直以黎我都無諗過揀廉航

廉航既飛機普遍坐位與坐位之間距離比較窄

始終去首爾都要飛成3個幾鐘,無理由虐待雙腳架

所以寧願用多少少錢買個舒適

一般黎講,我既首選都係cathay/油王航空

但唔知係咪首爾真係咁受香港旅客歡迎

連搵agent都買唔到cathay凌晨機去晚機返既機票

最sad係,竟然連大韓都無位~~~~~

呢個時候,agent就話韓亞(oz)仲有last 3個機位

雖然唔係咁想,但時間緊迫,地點無謂再轉黎轉去

所以oz都照殺!!!

____________ 

韓亞係南韓係市場佔有率第2高既航空公司

但佢比我既感覺真係唔似一間大型航空公司  

 點解我咁講??我有以下幾點可以證明我以上講既呢返說話


 1. 不能預先check in


我說清楚一點,oz不接受買團體飛既旅客預先check in

如果你是手持官網訂購的散客飛是可以使用呢項服務的

同cathay一樣,飛行日期3日前可透過官網預先揀位及check in

提醒各位,若果係經agent買機票既話,你9成就係手持團體平飛

所以想坐窗口位/逃生門附近,唯有儘早去機場啦 

呢項安排真係令我覺得好費解

預先劃位既可以令整個check in手續更省時快捷 

同時又能夠減低地勤人員既工作

一舉兩得,有d咩唔好?


 2. 航機型號較舊 


呢排成日坐大機,已經有好幾年無坐過細機

呢次旅程,我地來回首爾既機種就係A320~

對上一次坐A320,我諗至少係7,8年前既事啦

不過,佢都有唔同既機種往返首爾同香港,例如B747

只係我地遇咁岩唔到

細機ok,佢既機艙都好整潔,問題出在冷氣上

成程機,簡直同無開冷氣一樣,愈坐愈熱

佢熱既程度係令人訓左都會出汗果種

我自問坐過好多唔同航空公司既飛機

例如係hk airline,air china,ox等等

但係無一次好似今次咁坐到又熱又焗

佢既冷氣供應系統認真要改善一下


  3. 地勤員工對程序不熟悉


 之前上網爬文時,我見到有乘客話可以係去程時預先劃定回程既坐位

為左節省回程check in時間,我就隨機搵一位地勤了解一下

但佢就露出一副咩都唔知既表情

我問佢可唔可以幫手問問其他職員

但結果答案唔係得或唔得,而係唔知

咁樣好似唔太專業呢.......

以上3樣都令我覺得韓亞真係有待改善

但呢篇係飛機餐篇,所以都係快d入正題先~

____________

對於韓國airlines飛機餐,我真心有少少期待

可能我覺得佢地會俾d辣野/泡菜類既菜式我掛??

不過我係有準備既人,點都要打定個底既~

因為凌晨機,check in同攞完wifi bb後好多餐廳都陸續打烊

無咩選擇下,唯有食美心既焗豬飯+m記既新包餐

或者係去旅行心情太好,所以食咩都覺得好好食!! 

 

今次去程坐既飛機係呢款

雖然細,又舊舊地,不過機艙都好整潔舒服

最緊要係有影音設備同差電位~

 

有電影,音樂我就OK架啦~

雖然話只係3個幾鐘,但成程機有呢D輔助設備就唔使咁悶

 

音樂種類有好多呀~真係估佢唔到

而且最surprise係一d new album都有 

  

而我,當然要聽我另一個honey,bruno mars既album :)

真係聽幾多次都唔厭

仲睇多次壞蛋獎門人添~

未落機節目就已經好豐富啦~
  
去程

 

韓亞是用這種可循環再用的餐具

雖然環保,但我覺得飛機呢種載客量高既交通工具,用即棄會比較衛生



茶杯樣式反而更讓我喜愛

紅色夠sharp之餘,看上去也很優雅

 

飛機餐方面,今日菜式有肉醬意粉&雞肉飯
 
 隨主菜附送麵包一個,前菜一小碗,蛋糕一件同飲品一杯



麵包凍冰冰,不過口感唔會好硬

係正常既飛機餐麵包水準

但係點都估唔到,之後既正餐先叫精彩................

 

前菜係洋蔥辣豆角

豆角都算青綠,應該仲幾新鮮既

但我個人唔鐘意係飛機食凍既鹹食,所以真係提唔起興趣

試食一小口,同想像一樣,感覺好奇怪,味道亦麻麻

 

之前cathay飛機餐都有呢道菜:肉醬長通粉

但今次難食好多好多

長通粉好"淋",入口即化

整個粉交織住水同酸蕃茄醬味

食一啖已經如入無人之境!!!

 

以為肉醬意粉已經經典,點知雞肉飯比佢有過之而無不及

 雞一大陣雪味不在話下,而且肉質有點霉

最慘係脂肪都幾多,好肥膩

汁醬又稠又少,味道更已被雪雞味蓋過

比意粉更快放棄



甜品係士多啤梨味蛋糕

與其話係蛋糕,用mousse黎形容好似比較貼切

呢個甜品算係整餐當中比較好架啦~

質感滑,士多啤梨味濃

不過係飛機食呢類甜品始終覺得好guilty

因為落機之後肯定仲有更正既等緊我

無理由因為佢而爆quota架嘛~

所以淺嚐就足夠~

回程

  

如果話去程時因為係香港備餐而味道不佳

咁回程係韓國備餐,味道應該會好少少掛?!

今日餐單依然有雞肉飯,另一樣就換左"seafood"飯

 

相對起去程那道前菜,呢次既我更唔鐘意

本來就唔係好食火腿,煙肉既人

亦唔鐘意有青豆既沙津

加上千島醬汁太淡啦

sorry,唔係我杯茶~

 

一講起"seafood",正常黎講會expect有蝦/貝類吧

呢個seafood比較特別,只得魚

咁點解唔講清楚係魚飯呢??

我唔清楚呢種係咩魚,但魚腥味非常重

 

對一個本來就好怕魚腥味既人黎講,根本食唔落口

就係咁就浪費左成個飯..........

 

是日甜品係檸檬蛋糕 

檸檬蛋糕用cream比例較少,所以也比較清爽 

食完大半個也不覺得膩~

  

早前爬文時blogger一致話坐韓國airlines要點啤酒試下

因為佢地提供既都係韓國本土啤酒品牌

去程時我唔敢叫,因為一落機就有排山倒海既節目

回程時當然要把握機會飲飲~

cass係當地知名既啤酒品牌

基乎周圍都見到佢地d廣告

我覺得啤酒酒味比較淡,算易入口

如果飲開嘉x伯,藍x,咁cass一定唔岩你地

但平時少飲酒既朋友就可以一試 

____________  

論飛機餐質素,韓亞真係比我想像之中差好多

新鮮度都還可以,但味道真係唔合格

所以奉勸坐韓亞機既朋友,最好預先去機場打定底先穩陣D

 空中服務員既服務態度好好,好有禮貌又helpful

改善下d硬件回頭率應該會高d~