首爾 * 食 ::: 傳說中超美味牛腸

 

本來我應該順次序寫玩的,然後才寫吃的

但睇完先發覺點解旅遊點既相張張都影得咁差?!

再諗諗,相機幾乎都係honey手..............

唉,呢部單反用左2年啦,honey影人係進步左,但影景就...原地踏步ing

反正景點來來回回都係果幾個,不及寫食物來得有趣及多元化

今次就先將次序調轉,先寫食的好了~

____________

平時係香港,honey食量唔算好大(約一般男仔既3/4)

但到左旅行時間,佢就好似肚生蟲咁,1日食幾餐都面不改容

每次佢一定嘈住要去食宵夜

所以尋找好既宵夜地方,就成為我必要任務

好彩首爾治安唔錯,深夜係街遊走都唔覺危險~

其中一晚,我地就去左係韓劇入面經常出現既大排檔祭五臟

依家諗起都流口水呀><

 

就用doctor異鄉人既劇照俾大家作為環境參考~

大排檔擺設比較簡單,就幾張枱櫈同一個石油氣爐

當落order時,阿豬媽就會係度炒呀炒,傳出陣陣香味~

就算係本地人都好鐘意去飲返2杯同食幾味下酒菜架

今次我地都係隨機揀一間近酒店既

咁樣食完就可以快D返去沖涼訓覺啦~

 

係韓國最受歡迎既酒類有真露(燒酒)同長壽酒(米酒)

真露酒精濃度雖高,但幾乎係每枱必點之物  

只係我習慣旅行期間要保持思緒清晰

所以點長壽酒淺嚐就好

 

味道方面,我覺得有少少似清淡版糯米酒

係易入口既,不過就唔係我鐘意既味道

反而用黎盛酒既金色酒碗更得我心

用佢黎飲酒好有風味呢~

所以韓國餐廳都會提供餐前小食,連大排檔都唔例外

呢度既泡菜用菜頭淹製,有口感次餘又唔會死鹹

而黃瓜同樣係酸酸鹹鹹

不過份量調配唔夠和諧

所以兩者比較起黎,我都係鐘意泡菜多d

  

其實當時我地唔算好肚餓

因為之前去三清洞同東大門時,小食一攤接一攤

唔經唔覺都食到幾飽

所以呢次只不過係當體驗下

第一道上菜既係拉麵~~

講"拉麵"好似好勁咁,其實只不過係辛辣麵 = =

佢既讀法同日文"拉麵"讀音幾乎一樣

所以想點辛辣麵,用日文口音同阿豬媽講佢就明架啦

之前有blog友提過韓國人好食得鹹,煮拉麵放水量係我地既一半

不過呢次味道岩岩好~辛辣麵真係無得輸呀!!

記得之前爬文時有提過去韓國要試下食牛腸

係香港豬腸周圍都有,但牛腸.........好似真係好少食到

所以見到呢度餐牌有我就即刻要求點一客

真係~~~~~~~超好味!!!

牛腸處理得好好,爽口彈牙,完全無異味

而且伴以紅椒,青椒,椰菜同韓式辣醬同炒,為味蕾帶黎極高享受

雖然好好食,但對於我呢個好辣既人黎講都係覺得辣

所以少食辣既朋友記得同老闆講要少辣呀~

我諗再去首爾,其中一個原因肯定係為左呢碟辣炒牛腸:)

____________

 

 去旅行,最直接體驗當地風俗莫過於去地道既食堂

呢類大排檔衛生條件唔錯

老闆親切 (佢有用佢所識既普通話同我地傾計)

食物質素亦唔錯

咁人性化同地道化既地方,試問點可以唔去?!