東京 * 住 ::: E-hotel Hisgashi Shinjuku

 

以前同honey/朋友出國,唔係跟團就係搵相熟agent買pkg

真正自己搵機票酒店係第一次

 以為只係搶機票難,點知原來book酒店先係最令人眼花撩亂既一環

經濟實惠,地點好,酒店新根本係魚與熊掌,不能兼得

最刺激係酒店網站原來日日價錢都唔同

忽然覺得呢次旅程令我獲益甚豐~

今次東京近郊行我地住過3間酒店

住得最長就係呢間位於東新宿既e-hotel

所以理想當然地要先介紹下佢~

____________

 

e-hotel位處東新宿

呢個位置方唔方便其實好可圈可點

由酒店步行至新宿JR站要約10-12分鐘

如果你既行程係圍繞住JR沿線既,方便就稱唔上

但如果係都營地鐵沿線咁就非常方便

因為酒店就正正係都營地鐵東新宿站隔離

不過可幸係酒店位處於明治通上

沿路都會經過好多商店,食肆同花園神社

有時睇得入迷,唔經唔覺就行到返酒店

最重要係以新舊程求同地理位置上,價錢算係非常合理

____________

 最初計劃本來係除左箱根外,其餘時間都住e-hotel

但係就係一下既猶豫,其中一日既客房竟然fully booking

我除左驚訝於佢咁搶手外,仲每日上官網同酒店網睇幾次

結果都係無房

所以建議各位如果真係心儀e-hotel

係確認機票後就儘快訂房了

最後我地第1晚,第4至第7晚入住e-hotel

行李寄放服務亦要提及一下

即日取回行李既寄存服務固然提供俾每位住客

但其實仲有一種3日免費寄存服務俾之後會再入住既朋友

以我地為例,由於第4晚都會入住e-hotel

所以check in時我就同職員講2日後會再住呢度

想將兩個gib寄放直至返黎果日

俾預先print好既收據佢睇,確認完ok就可以

而且件數是不限的~

最後係網購物件酒店都可以幫忙代收~

不過係入住前只能免費寄放3日

所以要計準時間send過去,以免被徵收額外費用

 
____________ 

check in大堂係2樓,設計令人感覺舒適

對客房既期待變相多一點點

 

一踏入房既正對面就係雙人床

雖然同同伴既關係唔係情侶

但由於日本酒店既雙人床房比雙床房價格較相宜

而我地兩個又係無咩所謂既人

所以除左箱根果晚之外,全程預訂既都係雙人床房

e-hotel床既size同舒適度我覺得屬適中型

但枕頭就比較軟

不過對於每日拖住疲累身驅返酒店既我地就無太大影響

 

床既側邊有軟墊

雖然應該未至於有人會不斷撞埋牆

不過可以令人放心睡也是一種貼心舉動

 

床頭背對窗戶

早晨陽光透入房唔會覺得刺眼 

 

 床既左邊有一張長枱

雪櫃,熱水壺,電制等基本設備都係呢個空間度

我覺得實用度都算幾高~



床既正對面係浴室

門只可向外拉而唔可以向入面推

呢點我就算係往後幾日用左好多次都仲未習慣

不過因為空間有限

呢個設計亦無可厚非

 

浴室非常細

就算1個人轉身都非常勉強

好似我呢種咁粗魯既人係浴缸沖涼時就成日撞到手腳

但要強調整潔衞生度都唔錯

至少肉眼見唔到有明顯既污穢

呢點已經非常乎合我地既要求了

 

由於浴室空間細,以致一般梳洗設備都只能放馬桶上

外觀睇真係麻麻

最基本既牙刷牙膏風筒洗手液都備有

就係攞既時候要小心避免跌入馬桶內

不過e-hotel既牙刷牙頭位好細,又唔好握

建議住呢間酒店既朋友自備牙刷

 

個人護理用品唔知係唔係花王架呢

 我覺得還可以

日本細酒店好多係呢個設計

環保得黎又可以減少浪費

  

雖然空間細用呢種掛衫方法無可厚非

我亦覺得無咩大問題

不過如果可以提供多幾個掛鈎就更好

因為如果冬天2人份既厚重外套應該會不敷應用吧

呢條長走廊就係唯一可以打開gib既地方

呢個房型實用性算唔錯

之後我再返去住既果種房型設計更差

床係中間,無長形枱,床側面正對洗手間

掛鈎既地方同睡床只有半個身位之隔,一行過衣物就會掉下來

好掛住grandbell呀.........

 

酒店位處明治通上,沿途有好多餐廳(24小時營業既都不少)

對鐘意食宵夜既朋友黎講非常方便

就算凌晨1,2點都唔會覺得好靜好危險

____________

 總括黎講e-hotel唔係最出色

但就性價比黎講我覺得已經算唔錯

地點雖然唔近JR站,但都營地鐵站就係酒店隔離

而餐廳更加唔需要擔心,因為總有一間係你左近

宵夜類型更加多不勝數

唯一缺點就係部份房間設計唔人性化

而其他卜友提到夜晚經常聽到救護車聲

我個人黎講覺得還好

因為經常睡眠不足,所以每日都極速入睡

果少少既聲音影響唔到我既睡眠質素

但如果對聲音比較每感既朋友就要考慮清楚

鐘意熱鬧同方便,但budget有限既朋友

e-hotel可以推薦

地址:東京都新宿區2-3-15 Kabukicho 160-0021