首爾 * 食 ::: 토속촌 土俗人蔘雞湯

 

人蔘為韓國名物是常識吧

今次去首爾,我地都有被要求買人蔘回來

 雖然平時唔太鐘意人蔘陣味

但一場黎到,無理由唔試下佢既副產物架

上網搵到呢間非常有名氣既"土俗人蔘雞湯"

位置正正係景福宮附近

既然咁方便,我地都不免俗去試下

到埗第一餐就獻俾佢吧~~

____________

 

由於搭凌晨機既關係,所以時間真係好鬆動

 我地由9點開始遊覽景福宮

行完成個宮殿,影相再加埋睇完交接儀式先12點稍過

呢個時間步行去"土俗人蔘雞湯"食lunch就岩岩好

由景福宮步行去"土俗",如果找到正確方向的話只需大概10分鐘

從興禮門廣場正門向左行,至路口轉右,過對面馬路

一直直行到第三個巷口就可以轉左了

走到巷口盡頭就可看到大馬路

 

大馬路的對面就有"土俗"大大個招牌架啦~~

  

如果係地鐵既話,就乘搭地鐵2號線到景福宮站,出閘後搵2號出口

行出地鐵站後唔使過馬路,只須往你既前方直行

見到GS25便利店後轉左就係"土俗"了~

係地鐵站呢邊行過去有個好處,就係唔會迷失方向

直路兩旁仲有好多賣衫同小食店~



土俗既店鋪風格係古色古香型,好似傳統既韓屋一樣

我地係路上識到兩個學生台妹

既然傾得投契,目的地又一樣,就齊齊食lunch啦~

一行4人去到餐廳時正值lunch高峰時段

但意外地唔需要等位,直接行入去搵位就得

入面既空間超大!!分塌塌米式同餐桌式用餐區

我呢d老骨頭,梗係要坐餐桌式的

其實呢度既環境,清潔同舒適度真係一般

人流黎得快去得快,就算多人,我諗等候時間都唔使好長

坐低睇餐牌,食物種類得幾款,所以好快就決定到食咩

本來我同honey想說點兩款雞湯share食(培植山蔘烏雞蔘湯同蔘雞湯)

但諗諗下記得之前爬文時好多位卜友都話味道無大分別

最最最重要係我倆本來就對人蔘無咩大好感

所以要最普通試下就算嚕~

 

呢度既泡菜同辣蘿蔔放係一個小缽內

要食幾多就自己盛幾多

泡菜夠凍,辣度中等,口感都ok

 不過我始終唔係咁鐘意佢無遮無掩就咁放係度

感覺人地講野時d口水都會噴到落去咁,好唔衛生(潔癖怪)

今次去韓國,我對辣蘿蔔竟然有新既體會

相比起泡菜,我更加鐘意呢樣極有口感既美食

又甜又辣又爽,層次豐富分明

香港好少地方供應呢類一粒粒既辣蘿蔔呢

所以每次係餐廳見到都會狂食 :)

 

等左一陣,主角黎啦~

上桌時熱辣辣,仲冒緊煙

睇相都覺得佢好collagen!!


(pic copy from 芸芸)

我成日同honey講,我都係做唔到一個稱職既blogger.....

因為我一見到野食就會急不及待拎起碗筷試味

完全唔記得左影相呢回事..............

所以就借其他卜友既相俾大家參考參考

唔好以為外觀平平無奇只得雞一隻

其實雞腔裡面大有乾坤~

 包著栗子,糯米,紅棗,人蔘等材料

韓國食物著重養生,所用材料都經心思搭配,互補不足

蔘雞湯適合用來補身,可以解決手腳冰冷問題

雖然大家都讚好,但我自己就麻麻鐘意

其一係包係雞腔內既糯米唔岩我口味

我唔係唔食糯米,例如生炒糯米飯就係賣飛佛

因為果種黏黏既口感同多元化既配料實在好吸引 

但蔘雞湯既糯米沾唔到雞同人蔘既香味
  

淡而無味但又黏口既感覺,我食少少已經想放棄 

其次係我覺得湯味唔夠濃郁 

本來我以為雞與配料融合後湯頭會又甜又鮮味 

但飲起來又唔覺得有咩特別
  

甚至我覺得我媽煲既雞湯比呢度既更好飲 

或者冬天時飲會比較適合

另外呢度既雞肉食起黎亦唔太嫰滑

應該是燉煮的時間控制不好

可幸雞肉脂肪少,飲起黎唔會覺得肥膩 

____________

吃完後,我地4個都一致覺得"土俗"真心一般

不過口味始終好個人

如果唔係都唔會客似雲來啦

去遊覽景福宮既朋友,有時間可以過來試試呢~

地址: 서울시  종로구 체부동 85-1
電話: 02-737-7444
營業時間: 10:00~22:00