廣州 * 食 ::: 廣州酒家

 

人就係咁,懶開就想繼續懶落去

唔寫blog一兩日,就好自然連第三日第四日都唔想寫

由於生日就到,honey知我想逃出香港,所以就提議平平地黎個廣州遊

佢講開我先醒起,原來之前去咁多次廣州都無寫到D咩出黎

真係好慚愧呀!!

所以快快手寫返D食記出黎先得!!!

____________

講起廣州,我身邊既朋友真係好有意思~

每次我返去,佢地第一樣問既唔係:有咩好食/好玩?

而係:返大6咁危險你都去?!

最妙係同10個人講10個人都係同一反應

但我都係果句~出外旅遊本來就應該提高警剔~

證件銀包分開放之餘,亦要叫同行既人幫手留意包包既情況

凡事小心d,出錯既機會少d~咁成個trip都會完滿d啦~

____________

廣州有無數老牌酒家,好多有名氣既係我婆婆既年代已經開始經營

現今依然keep得住品質既有廣州酒家,陶陶居同南苑

3間之中我最心儀既一定係南苑

美麗既亭台樓閣式建築,有質素既美味點心,諗起都流口水呀~

 不過南苑交通唔方便,而且太多人等位

所以最後都係揀左廣州酒家

____________

一入去感覺同以前差唔多,只係光猛左好多,而且仲有沙發位

 

不過碗碟精緻度就麻麻~

但要強調是乾淨的

 

茶壺相對較古色古香

咁先襯返呢間老牌酒家既形象架嘛~

 

menu有好多唔同選擇,魚肉海鮮燒味炒粉麵包點甜點樣樣齊

突然好想食燒鵝,就點個例牌試下~

上菜時碟下面有微火熱住,咁燒鵝油就唔會冷卻凝固

呢一點我覺得相當貼心

相中可以睇到鵝皮燒得金黃香脆

味道方面唔會過鹹,只係肥膏太多,比較油膩

 

呢味XO醬煎釀豆腐非常岩我口味

豆腐有輕輕過油成金黃色,賣相很美

但食落口時又唔會feel到成口油

XO醬味道非常好,唔會好辣但就食得海味既鹹香味

味道偏淡既豆腐同鮮味既XO醬簡直係絕配!!



近呢幾年唔知點解對茄子有種執著既喜好

每次見到茄子類既菜式就會忍唔住想食

干炒四季豆食得多,但配茄子既干炒四季豆又好似未見過喎

咁當然要叫返一碟試下啦~

 呢道菜有"鑊氣"之餘,味道亦調配得宜 

要知道坊間下豆豉及油的份量普遍過重,所以味道又鹹負擔又重

廣州酒家的雖然食多幾啖都係會覺得少少油

但整體ok,不失為下飯既好選擇~

 

依家睇返相先至發覺,點解我地叫既菜式都係比較肥膩既?!

肥死啦肥死啦!!好大罪惡感.........

不過以上幾道菜大家可以唔食,但廣州既乾炒牛河就一定要試!!

廣州牛肉牛味濃,質地較"稔"而且口感爽脆

未計廚師烹煮功力已先嬴在起跑線上

而且廚功們都會先把河粉拆散

咁係炒既過程中每一條河炒都可以沾滿光澤同均勻上色

牛河賣相好,味道亦好

不過為健康著想,都係少食為妙~

____________

 綜合呢幾道菜黎講,廣州酒家水準同以前唔算相差好遠

尤以乾炒牛河做得最出色

想食正宗粵菜都係一個唔錯既選擇

睇下下次幾時有時間再帶honey食埋南苑同陶陶居啦~~