廣州 * 食 ::: 天使簡約 Angel Simple

 

去廣州少不免以"食"為首要目標

唔好以為廣州只有粵菜做得出色,佢地既糕點水準亦都相當唔錯

咁多間連鎖店當中,以"天使簡約"最岩我口味

店面以綠白為主調,配以幾張小巧餐枱,營造悠閒感覺

其中芝士蛋糕系列係佢既主打

果種濃濃芝士香加上鬆軟口感簡直將我既心完全俘虜~

如此有水準既店鋪,我決定無私心咁分享俾大家~ 

____________

其實買呢幾件蛋糕時,我地先岩岩飲完茶

 但見到cheese cake,我又忍唔住想食...........

係芸芸選擇之下,我好忍手地只買了3件

 

芝士蛋糕 (13rmb)
 

其實以廣州既物價黎講,13蚊一件size咁細既蛋糕真係幾貴

不過我又覺得佢既質素真係唔錯

芝士味香濃,食落口鬆鬆軟軟

而且size好岩女仔一個人獨享,過足口引之餘又無罪惡感,正!!

 

蛋白芝士帽子蛋糕 (11rmb) 

第一眼見佢外型幾討好,所以直覺味道應該都唔錯

但事實係:相對岩岩既芝士蛋糕,呢個真係失色好多

口感無錯係好軟滑,但芝士味已經被蛋白味蓋過

淡而無味既感覺充斥住整個口腔

真係好難相信竟然出自同一間店鋪,落差太大啦!!

 

虎皮紋綠茶蛋糕 (9rmb) 
 

呢件雖然唔係芝士蛋糕,但綠茶控如我簡直就一見傾心

虎皮紋蛋糕質感不錯,沾上忌廉後整體味道更佳

至於綠茶蛋糕,每食一口都感受到陣陣茶香

味道絕對唔係香精所能媲美既

富層次既口感,對真材實料既堅持,就係令顧客回頭既重要原因

____________

天使可能真係有DD貴

但論質素味道,我覺得呢個價錢可以接受

如果大家是甜點芝士愛好者,一試無妨!!