首爾 * 食 ::: 明洞小食

 

唔知幾時,去韓掃街呢個行程已經不可或缺

honey鐘意街頭小食,所以佢有特別提我要幫佢安插呢個環節

至於我,重視衛生多於美味,對掃街本來就好感度麻麻

不過既然蜜糖咁興致勃勃,我亦捨命陪君子

就係咁,我地2個係明洞失心瘋地買之餘,亦都無休止地食食食食食....

____________

呢d小食檔實際上唔係只得明洞有,係旺區幾乎隨處都見到

只係明洞係遊客既朝聖地,所以攤位多d,去貨快d,感覺會新鮮d

企係明洞主街大家就會見到兩旁有大量售賣鹹點甜點既小攤檔

一直伸延至兩,三條街既盡頭

而且愈夜愈熱鬧

想體驗掃街風味,去明洞的確係唔錯既選擇~

 

我地去首爾時正值初夏,天氣又熱又焗

行街時見到呢種彎形雪糕人手一條,直覺味道應該唔錯,就果斷買下

 呢個雪糕外形夠唒創意,只係好睇唔好食呢個詞語好岩用黎形容佢

雪糕的確幾滑,但雪糕筒唔脆之餘仲"稔稔"地

就因為雪糕筒既敗北令整個雪糕口感非常之差

或者我食慣左脆既甜筒,所以呢個雪糕我個人唔太鐘意

 之前睇食尚玩家有介紹過呢款雞蛋蛋糕,一直心郁郁好想試

蛋糕包住整顆雞蛋,味道係咪只得甜味既呢?!

 

依家諗返其實咁細粒賣1500won真係幾貴

不過貴還貴,佢既生意食然非常好

可能大家都同我一樣,抱住一試無妨既心態吧!

   

至於味道就無咩驚喜

蛋糕味道偏淡,蛋既味道同樣淡而無味

 而且我覺得蛋同蛋糕既質感唔係太夾

兩樣都係無咩口感既食物

如果換成麻糬可能會好食好多呀~

 

賣魚板既攤位生意非常好,仲有好多本地人買,味道應該有保障吧?

買魚板仲會奉送用黎浸住魚板既湯一小杯

雖然話係湯,但我覺得用味精水黎形容會貼切d

因為影得唔清(又係honey),就用潑畫效果黎修飾下佢啦~

由於淨魚板既味道始於較淡,所以檔口旁會提供辣椒醬俾大家自行添加

與辣醬同食辣得黎口感帶少許爽脆

雖然離驚為天人既境界仲差好遠

不過都不失為一個唔錯既小食選擇~

 

行過2檔就見到貌似食尚玩家都介紹過既"超美味炸醬面"

雖然賣相黑麻麻感覺同我地平時食開既炸醬面大不同

不過抱住只要試不要問既心態,我地依然有買喔~

 第一啖就已經覺得中伏

完全無層次既味道,只得甜.....甜.....然後都係甜

 

硬要講既話,我覺得似落左勁多平時用黎配腸粉既甜醬一樣

最詭異係連一粒肉既口感都食唔到

莫非肉粒已經完全融化左係d甜醬入面?!

嗯......或者我都係唔習慣食甜既炸醬吧

 

呢個韓式紫菜卷,係出發前honey同事推介必食既

所以我好好奇究竟咩紫菜卷係非食不可?!

卷內既配料可以自選,不過選擇唔多

大概係三文魚,泡菜,蟹籽,蔬菜呢幾款

 外貌平平無奇,食起黎又再一次有中伏感覺

紫菜唔脆,配料單調普通,飯空有黏性而無彈牙之感

邊度好食嘛..............

以為係呢一檔做得唔好,就決定第二日俾多次機會佢

點知無論味道口感都係一樣

韓式壽司果然唔係我杯茶啦~~

 

 明洞小食之旅以年糕串作結~

 

年糕富韓國特色,以呢樣煙韌彈牙既食材作為小食重點頗有風格

 

 再配合鹹香既廚師腸及刺激味蕾既韓式辣醬同芥末作點綴

整體感覺和諧,味道亦不錯

呢款小食比較推薦俾大家~

 ____________

其實掃街呢個環節本來就係注重風味多於食物本身既味道

至於衛生,唔算好乾淨,但都還可以接受
 

味道方面真心一般

對食有要求/怕肚痛,唔好猶豫,去餐廳會食得安心d

但如果想了解下本地人既飲食模式

街邊小食絕對係必要既一環~