fairyland * 炸雞與啤酒

 

自從係韓國返黎後,honey就對果度既炸雞念念不忘

每次提起果次旅行既事,佢都會碎碎念我點解唔食多幾餐炸雞

先生,炸雞好肥架呢~

不過為左塞住佢把口,我都有上網搵下香港有無正宗炸雞店

初初見到fairyland呢個名時仲以為係賣甜品西餅之類

到知道原來係炸雞店時真係呆左

點解炸雞會同童話有關?!

唔通係食左佢地既炸雞之後會令人有如置身童話之中?!(笑)

咁特別我都要去fairyland一下先得~

____________

fairyland營業時間由下午3點到凌晨2點,好岩鐘意宵夜既朋友

之前有好多飯友話果度地方好細

所以即使10點幾先去,我仍然擔心要等好耐

不過好彩當時仲有1張吉枱,唔使等~

依我所見,果度都有ok多韓國食客

既然韓國人都黎呢度,咁食物應該唔錯吧 

因為fairyland食物份量比較多2個人都食唔到幾多野

最後order左原味炸雞同芝士蛋卷

等待期間聽到隔離果枱韓國人不斷發出咬薯片既聲音

令到咁晏都未食晚餐既我更加肚餓

過左大概10-15分鐘,蛋卷終於整好~~



Honey一見到咁多茄汁就皺眉頭

我本身亦唔好茄汁,所以都好驚陣味太強烈

 

蛋卷既生熟程度控制得好好,中間仲有少少蛋汁流出黎

食落口感覺好嫩滑

 但係就嫌芝士味唔夠濃

食到一半開始覺得個口好寡

呢個時候果d起初被認為放得過量既茄汁發揮功效

估唔到蛋同茄汁原來咁夾~

最後係茄汁幫助下ko唒成份蛋卷

總體都唔錯,不過芝士味濃d更好食~

 

接住落黎就係食期待已久既炸雞啦!!!

今次點左原味有骨炸雞,附3種醬料,仲有酸蘿蔔無限供應

整個炸雞份量無我想像中多,但每個部位都有2舊

2個人share食就岩岩好~

酸蘿蔔味道麻麻,同係首爾食到既相差好遠

我地無續不單止,連一碟都食唔哂

 至於炸雞,可以揀有骨或無骨

 係正常情況下,我都深信有骨比無骨好食~

所以毫不猶豫揀左有骨

但想食得優雅d舒服d,無骨就係另一個理想選擇~

 

味道方面,我同honey都一致覺得有少少似kfc

或者係因為原味既關係啦

 肉質感覺亦麻麻,某d部位既肉有少少霉霉地

 薯片就更加唔好食

fairyland既同平時食卡樂v果d脆口薯片唔同,比較油同稔

可能唔係新鮮炸吧

所以油膩感比較重

附送既辣醬同豉油亦唔算特別出色

辣醬更加稍嫌唔夠辣

今次真係叫錯左.......辣味應該會好食好多...

____________

老實講,香港除左kfc之外,真係好少炸雞專門店

雖然我覺得fairyland既炸雞質素一般般

但都無後悔黎呢度

或者等到某一日"雞癮"再起,會俾多次機會佢既辣味炸雞都未定~