首爾 * 食 ::: 站著吃韓牛

 

好耐無寫首爾遊記~今日要清一清文先得!!

眾所周知,韓國既牛肉價錢一d都唔平

不過對於牛魔王既我黎講,唔試下韓牛總好似若有所失咁

爬文時見到台妹力推呢間"站著吃韓牛"

雖然環境麻麻

不過以超平價錢食到正宗韓牛呢點就已經夠哂吸引

岩岩好地點係新村,食完仲可以散步去梨大化化胃氣

 一舉三得,唔去唔得啦~

____________

我自己print行程時唔會規定邊一日要做d咩

只係會串連一d就近既景點

 到時再睇心情同天氣決定當日既路線

 我地每日係首爾都訓到王朝八晏

結果時間非常唔夠用

 本來諗住放棄"站著吃",食少餐黎趕其他行程

不過我諗諗下都係想食牛(食左幾日豬食到怕怕) 

最後就係我既堅持下將站著吃保留落黎~

 
路其實唔算難搵

先係新村地鐵站7號出口出黎,然後就會見到條大馬路

過對面,沿途會見到cafe bene同埋便利店

過左便利店再行前少少就會見到一條斜坡

一上斜坡右手邊已經係"站著吃韓牛"了~

 

如果都係唔肯定既,可以望下對面馬路

見到呢間藍色既HANA銀行,就知道方向正確~

上斜坡路就係呢間銀行既斜對面!!

 

佢開店時間係12:00

我地大概12:30左右去到,已經好多人係度排緊隊

當中有台灣人,香港人,有時仲夾雜幾個韓國人~

最憎排隊既honey見到條人龍就鄒唒眉頭,問我仲排唔排

排!!緊係排啦!!食到嘴邊既牛點可以話走就走!!!

 

等既時候陣陣香味飄出黎真係好難頂,唯有影下相黎分散注意力

用黎烤肉既爐都係石油氣權既形狀

 得意係幾得意,不過通風就好差

食完出黎肯定成身都係烤肉味.......

順帶一提,呢度真係純粹烤肉,除左飲品就無其他野點

 所以想配碗白飯又或者係泡菜

請移玉步自行到便利店購買

 

等左大約25分鐘,終於輪到我地啦~~

我地個位係最入面,鄰近呢一大堆炭

數量多到..........生意一定好好

  

阿珠媽執好枱後,就拎左3碗醬料,1小碟辣椒醬同幾條青椒黎

 

醬料入面既配料大致相同,有蔥,芝麻,麻油同醬油

不過其中1碗就加左好多大大粒既生蒜

呢碗有生蒜既醬料就被阿珠媽放左上鐵板度加熱

 

另外2碗應該就係沾醬~

就咁睇配牛應該幾惹味~~

 

至於青椒.........其實我唔係好明白點解烤肉要配青椒

唔係配生菜正常d咩?

見到隔離枱既韓國人將d青椒沾滿辣椒醬食

睇到我都出哂汗

叫honey試下味,佢食左一,兩啖之後都話食唔慣

我諗我都係唔可以做韓國人

就算幾鐘意辣都好,日日食我靈敏既舌頭應該好快頂唔順.......

 

雖然黎站著吃之前我地已經share食左一件ISSAC三文治

但隔離枱既韓國人,唔單止自備飲品,白飯同泡菜,仲有好多小菜

見到佢地食到好滿足既表情,我個肚就不斷以咕咕聲作為抗議

等左15mins呀珠媽先過黎分派牛扒

佢地默認一個人一份(其實韓國食飯全部都係2入起計,even你係1個人)

見到牛扒係鐵板上"ja ja"聲咁烤,果一刻竟然有少少感動

等左咁耐終於都有得食啦!!!(前後應該有45-50mins)

 

唔好睇牛扒好似細好細塊咁

但食起黎其實都唔少

牛扒得中間有骨

雖然唔係d咩靚牛肉

不過呢個價錢就絕對抵食

影完相後,阿珠媽行過見到牛扒仲原封不動放左係鐵板上

就快快手拎左把無比鋒利既紋剪出黎起勢咁剪呀剪

非常利落咁將牛扒剪成一小塊,好勁呀~~~

honey算係煎扒高手

所以我地全程都自助式

呀珠媽行過見到我地煎得唔錯都無再出手相助

不過如果煎得唔叻都唔緊要

因為呀珠媽們會係個場度行黎行去

見到雞手鴨腳既新手們就會幫手煎一煎

不過提醒大家鐵板既d火好旺

size細少少既牛儘量放側邊烤

另外由於牛牛同時係鐵板上烤既關係,一鑊熟機會好大

唔想牛牛overcooked,烤到咁上下時就先放側邊會比較好~

 

至於味道方面,牛的確幾嫰

不過調味稍嫌過重,牛味亦唔濃

淨食會愈食愈鹹,配飯就應該唔錯~

醬汁調配適宜,唔會死鹹,反而有清新既蔥蒜味

不過2種醬汁比較,我更愛放係鐵板上,滿滿大蒜果碗

可能蒜同牛始終係絕配吧

而且熱熱既汁醬亦特別惹味~

最後我地一塊不淨,清唒!! 

整體黎講我覺得站著吃可以推薦

價錢ok,食品ok,鍾意風味既朋友應該會更愛

____________

食完站著吃出黎難免成身都係烤肉味,大熱天時都幾難頂

我地即刻就走左去便利店買除臭劑

 honey問跟住係咪散步過去梨大

 呢個時候,我就擰頭再附加一個奸笑~

因為仲有一個大project等緊我地 :)

係咩就下回分解吧!!!

地址:  首爾特別市麻浦區老姑山洞109-69番地 　　　　

       (서울특별시 마포구 노고산동 109-69번지) 

營業時間：12:00~20:30